Aruba Birdlife Conservation ta sostene plan turistico, pero ta reclama falta di consulta

ORANJESTAD — Aruba Birdlife Conservation (ABC) ta sostene e iniciativa pa desaroya e Aruba Strategic Tourism Master Plan 2026–2031, pero ta reclama cu e organisacion no a wordo invita ni consulta durante e sesionnan di dialogo strategico. Presidente di ABC, Greg Peterson, a expresa esaki den un reaccion riba e plan turistico cu Noticiacla a publica recientemente.

Peterson a felicita Gobierno di Aruba y minister Wendrick Cicilia cu e iniciativa. Segun dje, un maneho renoba pa turismo ta importante pa futuro economico, calidad di bida y proteccion y recuperacion di naturalesa.

Sinembargo, e ta considera e ausencia di ABC den e proceso lamentabel, specialmente pasobra e publicacion ta referi na participacion di lidernan ambiental. “ABC no a wordo consulta ni pidi pa duna su aporte, apesar di su hopi añanan di experiencia den conservacion di naturalesa, proteccion di habitat, educacion ambiental y e relacion entre turismo y medio ambiente natural di Aruba,” Peterson a señala.

E presidente di ABC ta pidi pa consulta cu su organisacion y otro organisacionnan independiente di naturalesa tuma luga prome cu finalisa e plan. “Un consulta genuino mester tuma luga mientras cu ainda por influencia e plannan, no solamente despues cu e decisionnan principal ya a wordo tuma,” el a enfatisa.

Peterson a adverti cu, si ABC constata cu maneho, proyecto of decisionnan proponi ta perhudica naturalesa, especienan proteha of habitatnan vulnerabel, e organisacion por mira su mes obliga pa tuma accionnan apropia pa busca correccion. “Esaki no mester wordo interpreta como oposicion contra progreso,” el a declara, subrayando cu ABC ta sostene progreso cu ta respeta ley y proteha patrimonio natural di Aruba.

Segun Peterson, e condicion pa un maneho turistico verdaderamente sostenibel y regenerativo ta cla: “Naturalesa mester ta representa na mesa for di e prome momento.”