ATA ta busca turismo di mas balor mientras Argentina ta consolida su posicion

ORANJESTAD — Argentina a bira un mercado fundamental pa turismo di Aruba, segun Jordan Schlipken Croes, director di Aruba Tourism Authority (ATA) pa Latinoamerica. Den un entrevista cu Travel2latam durante feria turistico FIT, el a señala cu e enfoke ta riba genera mas balor economico y promove turismo responsabel.

Schlipken Croes a splica cu e strategia pa e aña aki y 2027 no ta concentra solamente riba cantidad di bishitante, sino riba mantene e nivel actual y atrae bishitantenan cu ta contribui mas na economia y ta respeta cultura, idioma, comunidad y naturalesa di Aruba.

E obhetivo ta conserva calidad, seguridad y tranquilidad di e destino pa e proximo 20 aña. El a menciona tambe inversionnan den infraestructura y renovacion hotelero, incluyendo un inversion multimillonario di Riu pa renoba casi tur su cambernan.

Pa 2027, ATA ta mira oportunidad den turismo di reunion, conferencia y biahe di incentivo, conoci como MICE. E enfoke ta riba atrae companianan argentino cu kier recompensa empleadonan, ekiponan of clientenan cu un biahe na Aruba.

Segun Schlipken Croes, e fortalecemento di mercado argentino ta resultado di añanan di trabou y colaboracion cu operadornan turistico, agencianan y aerolineanan.