The Balashi Beer Experience: Un inversion di 30 miyon den un atraccion nobo di siguiente nivel!

ORANJESTAD — Aruba ta na porta di conta cu un atraccion nobo y sigur unico: The Balashi Beer Experience. Diahuebs mainta, prensa local a haya un prome bista di e proyecto di MetaCorp, cu segun e CEO Eddie de Veer, a representa un inversion di 30 miyon  florin y 30 luna di desaroyo, for di idea te na su fase actual, cerca di apertura.

De Veer a splica cu e concepto a nace durante un conbersacion entre tres persona, ora cu e CFO di MetaCorp, Guus a propone pa crea un experiencia inspira pa atraccionnan similar na Hulanda. Den menos di 24 ora, e ekipo a establece contacto cu e empresa hulandes Sandenburg, specialisa den diseño di e tipo di experiencia aki. “Nos ta habri un capitulo nobo den MetaCorp su trayectoria,” De Veer a declara. El a indica cu e compania ta amplia su oferta di entretenimento, cu tradicionalmente ta inclui pelicula, pa incorpora un concepto di experiencia.

Sandenburg, bao direccion di Marcus y su equipo, a encarga cu e diseño y desaroyo di e experiencia. Ademas, 20 compania local a participa den materialisacion di e proyecto, cu a crea 17 empleo nobo bao guia di Gloria. “No ta un construccion di un cas of di un cinema. Bo ta bai comprende mas ora bo haci e tour,” De Veer a bisa, destacando e specialisacion necesario pa realiza e concepto.

E CEO a expresa orguyo den e resultado y a gradici tanto e ekipo como e companianan local pa nan esfuerzo pa cumpli cu e plazo, no obstante e atrasonan cu un proyecto di e magnitud aki por trece. El a destaca tambe e entusiasmo di e empleadonan nobo desde nan prome entrevista.

Segun e splicacion durante e presentacion, e lugar ta completamente accesibel pa personanan den rolstoel, cu un lift pa facilita acceso entre e diferente nivelnan.

De Veer a expresa su deseo cu The Balashi Beer Experience ta agrega balor na Gloria y na Aruba, tanto pa e turista bishitante como pa residente di Aruba.

Cu e apertura di The Balashi Beer Experience, Aruba por conta cu un berdadero experiencia unico y di siguiente nivel. E atraccion ta amplia e oferta di entretenimento y ta duna tanto bishitante como residente un motibo nobo pa descubri y disfruta loke Aruba tin pa ofrece, y den esaki tambe, educa con ta traha un cerbes netamente local, Balashi.