ORANJESTAD — Gobierno di Aruba a duna un paso importante den e proyecto pa establece un conexion di ferry di pasahero entre Aruba y Corsou. Minister di Finansa y Asunto Economico Geoffrey Wever a anuncia cu e compania Maritime & Logistics Consulting Group (MLCG) S.A. a haya e contrato pa investiga e viabilidad di e servicio y prepara un eventual destaho pa un operador.
E proyecto ta forma parti di cooperacion economico entre Aruba y Corsou, formalisa den un acuerdo di 2023, y ta wordo financia pa Hulanda via Landspakket.
Actualmente, transporte entre e dos islanan ta depende principalmente di avion, cu tarifanan cu por ta halto y disponibilidad limita. Un ferry por ofrece un alternativa pa residentenan y turista, mientras e ta stimula actividad economico entre e islanan.
E estudio lo consisti di dos fase. Prome lo investiga si un conexion di ferry ta viabel. Solamente si e resultado ta positivo, MLCG lo prepara e proceso di destaho pa selecciona un futuro operador.
E proceso di seleccion di e consultor a inclui negociacionnan, despues cu tur oferta inicial a supera e presupuesto estima cu mas di 20%.
Wever a enfatisa cu e proyecto ta busca transforma un deseo di hopi aña den un servicio sostenibel. Sinembargo, ainda no tin un operador contrata ni fecha determina pa cuminsamento di e ferry.