ORANJESTAD — Gobierno di Aruba ta alerta comunidad pa e peligernan di uzo incorecto y innecesario di antibiotica, cu por provoca cu bacteria bira resistente na remedi y haci infeccionnan cada bes mas dificil pa trata.
E advertencia ta forma parti di Siman Mundial di Concientisacion tocante Resistencia Antimicrobiano, cu ta tuma luga di 18 te 24 di november.
Resistencia antimicrobiano ta surgi ora bacteria, virus, fungi of parasita cambia y no ta reacciona mas riba remedi cu normalmente ta combati nan. Esaki por causa infeccionnan cu ta dura mas largo y aumenta riesgo di complicacion serio.
Gobierno ta enfatisa cu antibiotica no ta funciona contra virus manera griep y verkoudheid. Su uzo innecesario ta aumenta riesgo di resistencia bacteriano.
Autoridadnan ta recomenda uza antibiotica solamente cu receta di dokter, sigui e dosis y duracion prescribi y nunca comparti of bolbe uza remedi sobra di tratamento anterior.
Ademas, Gobierno ta stimula labamento frecuente di man, vacunacion y preparacion higienico di cuminda pa preveni infeccion.
E campaña internacional di e aña aki tin como lema Educate. Advocate. Act now., cu ta enfoca riba educacion, concientisacion y accion inmediato.