ORANJESTAD — Gobierno di Aruba, Corsou, Sint Maarten y Hulanda a acorda un werkagenda cu prioridadnan pa fortalece cooperacion entre e cuater paisnan, durante e prome Kingdom Summit cu a tuma luga 17 y 18 di november na Sint Maarten. Tambe a decidi pa organisa un conferencia di Reino anualmente, cu e proximo encuentro programa pa 2027 na Corsou, despues di 12 aña sin un Koninkrijksconferentie.
Premier Mike Eman di Aruba a participa hunto cu su coleganan Gilmar Pisas di Corsou, Luc Mercelina di Sint Maarten y Secretario di Estado hulandes Eric van der Burg.
E acuerdonan ta concentra riba desaroyo economico, bienestar social, seguridad, energia, cambio climatico y retencion di talento den e paisnan Caribense.
Un di e prioridadnan ta procura cu e entradanan di turismo beneficia e poblacion mas directamente. Tambe lo explora posibilidadnan pa financia inversionnan den infrastructura publico, transicion energetico y adaptacion na cambio climatico, incluyendo acceso na fondonan Europeo.
Otro tema importante ta cooperacion regional pa mehora maneho y procesamento di desperdicio. Ademas, Hulanda lo sostene esfuersonan pa atrae institucionnan di conocemento y empresanan hulandes pa crea mas oportunidad di trabou specialisa.
Pa Aruba y otro islanan, retencion di talento y regreso di studiantenan for di Hulanda ta un reto importante. E paisnan lo comparti experiencianan pa stimula regreso di profesionalnan y mehora sistemanan di pension, seguro di salud y proteccion social.
E werkagenda ta establece e temanan di cooperacion, pero e proyectonan concreto y nan financiamento ainda mester wordo elabora.