MEP ta duna Presidente di Parlamento 72 ora pa convoca 22 reunion pendiente

MEP ta duna Presidente di Parlamento 72 ora pa convoca 22 reunion pendiente

Posted on 11/19/2026, 2:44 PM AST | Updated on 11/19/2026, 2:45 PM AST

ORANJESTAD — Fraccion di MEP a exigi Presidente di Parlamento formalmente, sr. Sneek, pa dentro di 72 ora fiha fecha pa 22 reunion publico cu, segun e partido, ta pendiente desde hace basta tempo. MEP ta amenaza cu pasonan huridico si e presidente no cumpli cu e exigencia.

Segun MEP, Reglamento di Orde di Parlamento ta stipula cu ora tres parlamentario solicita un reunion publico por escrito, e presidente mester convoca e reunion dentro di 30 dia. E partido ta sostene cu e termino legal aki a pasa pa tur 22 peticion, mientras cu e peticion mas bieu tin casi un aña y mey pendiente.

E reunionnan solicita ta trata temanan importante manera Ley di Reino HOFA, integridad gubernamental, remedi, cuido di mucha, situacion financiero di Hospital Horacio Oduber (HOH) y costo di bida.

MEP ta considera tratamiento di Ley di Reino HOFA particularmente urgente, despues cu Minister di Finansa Geoffrey Wever a indica cu negociacionnan cu Hulanda lo conclui e luna aki. Segun e partido, Parlamento ainda no a haya oportunidad pa debati publicamente un ley cu por tin consecuencia importante pa autonomia financiero di Aruba.

Fraccion di MEP a recorda cu ya dia 20 di april 2026 el a manda un carta na presidente tocante su obligacion, pero no a ricibi contesta. Un copia di e exigencia actual a wordo manda na Gobernador di Aruba. "Reglamento di Orde ta conta pa tur hende, tambe pa e presidente. Parlamento ta di pueblo, no di coalicion so," lider di fraccion MEP, Evelyn Wever-Croes, a declara.