Polis di Aruba y Caribe ta traha hunto pa mehora organisacion y eficiencia

Polis di Aruba y Caribe ta traha hunto pa mehora organisacion y eficiencia

Posted on 11/19/2026, 2:42 PM AST | Updated on 11/19/2026, 2:42 PM AST

WILLEMSTAD — Casi 80 empleado y dirigente di cuerponan di polis di Aruba, Corsou, Sint Maarten, Hulanda Caribense y Recherche Samenwerkingsteam (RST) a participa na un conferencia na Corsou, dia 12 y 13 di november, pa fortalece maneho interno y eficiencia di organisacionnan policial.

Durante e conferencia, organisa pa Colegio di Hefenan di Polis y Plataforma di Hefenan di Bedrijfsvoering Caribe (PHBC), a enfatisa cu bon trabou policial no ta depende solamente di agentenan riba caya, sino tambe di un organisacion interno eficiente, cu personal prepara, vehiculonan, facilidadnan, tecnologia y recursonan financiero.

Presidente di Colegio di Hefenan di Polis, Carl John, a describi maneho interno como e curason di organisacion policial. Hefe di Polis di Corsou, Raymond Ellis, a enfatisa cu empleadonan responsabel pa e operacion interno mester haya mas participacion den decisionnan importante.

E conferencia a concentra riba e Plan di Desaroyo 2027–2030, cu ta inclui digitalisacion, capacitacion di personal, maneho di contractnan y cooperacion entre cuerponan di polis.

Participantenan a sigui tambe sesionnan tocante inteligencia artificial (AI), desaroyo profesional y solucionnan pa limitacion di personal y recurso den islanan chikito.

E resultadonan lo wordo incorpora den e plan di desaroyo, cu meta di fortalece cooperacion y eficiencia di cuerponan di polis den Caribe.