ORANJESTAD — Sector hotelero di Aruba por hunga un papel mucho mas grandi den proteccion di naturaleza y solucion di problemanan ambiental di nos isla. Esaki ta e vision di Jareth Vermeulen, Destination Stewardship Manager di JOIA Aruba by Iberostar, kende durante un entrevista exclusivo cu Noticiacla a splica con e compania ta reuni hotelnan, fundacionnan y organisacionnan ambiental pa desaroya proyectonan concreto, entre otro pa proteccion di shoco, conservacion di coraal, reduccion di sushi y educacion ambiental. Segun Vermeulen, e intencion ta pa crea un sistema di cooperacion caminda diferente compania y organisacion por contribui na proteccion di Aruba. "Mi no ta considera mi mes un lider, sino un catalisador", Vermeulen a splica, destacando cu su meta ta pa otro hotelnan tambe participa.
1.200 TRAHADO PREPARA PA PROTEHA SHOCO
Un di e proyectonan mas notable ta proteccion di shoco, e nacional simbolo di Aruba, cu su existencia ta bao presion. Vermeulen a revela cu aproximadamente 1.200 trahado di diferente hotel a participa den e programa Shoco Ambassador, entre otro di Iberostar, Marriott, Boardwalk y Bucuti. Durante e entrenamiento, empleadonan ta haya informacion tocante importancia ecologico di shoco, su habitat y e manera cu nan por contribui na su proteccion. E iniciativa ta forma parti di un cooperacion cu Aruba Birdlif conservation y otro partnernan, cu ta trahando pa mehora condicionnan di bida di e parha. Segun Vermeulen, aproximadamente 20% di e poblacion di shoco di Aruba ta biba den area di Tierra del Sol, mientras un otro concentracion importante ta den area di San Nicolas.
E proyecto a contribui na instalacion di 50 buraco artificial pa shoco, mientras otro 150 ta disponibel pa instalacion, cu sosten financiero y material di partnernan. E meta ta pa yega na 500 buraco artificial pa aña 2030. Vermeulen tambe a destaca cu e proyecto ta busca un solucion mas duradero pa conecta diferente habitat, pa evita cu poblacionnan di shoco keda separa y perde diversidad genetico. Un conferencia cientifico internacional tocante e parha a contribui na preparacion di un plan nacional di conservacion, presenta na Departamento di Naturaleza y Medio Ambiente.t
OCHO STAKEHOLDERS INCLUSO HOTELNAN TA UNI PA REDUCI SUSHI ORGANICO
Un otro iniciativa cu ta gana terreno ta e cooperacion entre ocho stakeholders incluso hotelnan y Alto Vista Winery pa procesa sushi organico. Segun Vermeulen, aproximadamente 70% di e sushi cu e hotelnan a identifica den e proyecto ta consisti di material organico. En bes di manda tur e material aki den e sistema convencional di disposicion, e hotelnan ta separa restonan di cuminda, kofie, casca di webo y otro producto biodegradabel. E material ta wordo transporta pa Alto Vista Winery, caminda e ta wordo transforma den compost.
JOIA ARUBA BY IBEROSTAR A CUMINSA MANDA SU SUSHI ORGANICO PA E PROYECTO APROXIMADAMENTE UN LUNA PASA.
E iniciativa a conta cu cooperacion di diferente stakeholders incluso hotelnan cu participacion di e compania internacional Sinba, cu experiencia den maneho di sushi organico. Vermeulen ta considera cu Aruba mester amplia e sistema aki pa otro categoria di sushi, entre otro glas, plastic y material peligroso. Pa december, e partnernan tin intencion di organisa un conferencia tocante maneho di sushi, pa discuti con e cooperacion por wordo amplia.