BOSTON — Dos decision judicial reciente na Merca ta pone mas presion riba Customs and Border Protection (CBP) pa su practica di confisca y examina telefon celular y otro aparato electronico di ciudadanonan mericano sin orden hudicial.
Un di e casonan tin conexion directo cu Aruba. Abogado Andrew Lattarulo tabata bolbiendo di vakantie na Aruba, unda el a pasa control migratorio di Merca na aeropuerto, mediante e sistema di preclearance. Sinembargo, ora el a yega na aeropuerto Logan na Boston, agentenan di CBP y Departamento di Seguridad Nacional (DHS) a confisca su telefon y posteriormente a copia tur su informacion.
Gobierno mericano ta sostene cu e confiscacion tabata parti di un investigacion tocante empleo ilegal di extranheronan den su firma di abogado. Pero Hues Allison Burroughs a cuestiona e explicacion, señalando indicacionnan cu e accion por tabata represalia contra Lattarulo pa su expresionnan publico na defensa di derechonan di inmigrantenan.
E hues a prohibi Gobierno di descifra e informacion copia di su telefon mientras e caso ta pendiente.
Den un di dos caso, CBP a confisca aparatonan electronico di enfermero Muhammad Numaan Imam y su famia na aeropuerto Washington-Dulles, despues cu nan a regresa di Turquia. Imam a rechasa entrega su contraseñanan, alegando confidencialidad di informacion di paciente.
Hues Leonie Brinkema a cuestiona e intento di Gobierno pa mantene secreto informacion tocante loke CBP a haci cu e aparatonan confisca.
E dos casonan ta pone den discusion e limite di autoridad di CBP pa inspecciona aparatonan electronico sin orden judicial, particularmente ora ta trata di informacion privado y comunicacion confidencial.
E caso cu a cuminsa despues di un biahe for di Aruba ta resalta cu hasta ciudadanonan mericano cu ya a pasa control migratorio na Aruba por enfrenta inspeccionnan adicional na nan yegada na Merca.