Algemene Rekenkamer ta haya casi 7% mas presupuesto pa 2027

ORANJESTAD — Algemene Rekenkamer Aruba lo dispone di Afl. 4,15 miyon pa 2027, un aumento di Afl. 265.000, equivalente na casi 7%, compara cu e presupuesto di 2026. Esaki ta resulta di un landsverordening publica dia 2 di november.

E aumento ta bin den un periodo cu Rekenkamer ta sigui alerta riba deficiencianan structural den maneho financiero di Gobierno di Aruba.

Den su rapport Buiten beeld, buiten controle, publica na mei, Rekenkamer a señala cu centenares di miyon di florin di fondo publico ta keda insuficientemente bao supervision di Parlamento.

Segun e institucion, presupuestonan di fondonan gubernamental ta wordo aproba laat, cuenta anual ta falta y algun gasto ta wordo haci sin autorizacion previo di Parlamento. Esaki ta debilita control parlamentario riba finansa publico.

E presupuesto nobo a wordo aproba dia 22 di october, pero no ta specifica con e aumento lo wordo uza, sea pa personal, mas investigacion of otro actividadnan.

Algemene Rekenkamer ta encarga cu supervision independiente di legalidad y eficiencia di gasto publico na Aruba.