Grupo di Betico a celebra 58 aña cu concierto sold out y tres ora di nostalgia

ORANJESTAD — Un sala completamente yen, tres ora di musica, baile y un ambiente yen di alegria y nostalgia. Asina Grupo di Betico a celebra su 58 aniversario diahuebs anochi, 5 di november, cu e gran concierto “Nostalgia di Fin di Aña” na Renaissance Convention Center. E concierto, cu tabata sold out, a reuni un publico entusiasma cu durante tres ora largo a baila, canta y goza di e ritmonan y melodianan cu durante casi seis decada a forma parti di tradicion musical Arubano.

Bao direccion musical di Gos Oduber, y cu produccion di Miguel Genser y Maikol Lugo, Grupo di Betico a presenta un espectaculo dedica na su herencia musical rico, cu un repertorio di alrededor di 50 cancion saca for di su 10 produccionnan. E presentacion a conta tambe cu efectonan especial di luz y video.

Desde su fundacion na 1968, Grupo di Betico a conkista un luga special den cultura Arubano, particularmente cu su musica di fin di aña, cu pa generacion tras di generacion ta forma parti di e ambiente festivo na nos isla.

E concierto di diahuebs anochi no tabata solamente un celebracion di 58 aña di existencia, sino tambe un encuentro entre generacionnan cu a crece cu e musica di Grupo di Betico.

E reaccion entusiasma di publico, cu a yena e sala completamente y a sigui bailando durante henter e espectaculo, a demonstra e cariño cu e grupo ainda ta disfruta den comunidad Arubano. Despues di 58 aña, Grupo di Betico a bolbe demostra cu su musica no ta solamente nostalgia, sino un tradicion bibo cu ainda ta pone Aruba baila.