Otmar Oduber(PPA): Gobierno mester baha costo di bida, no solamente aumenta salario

ORANJESTAD — Lider di PPA, Otmar Oduber, ta critica e enfasis di Gobierno riba aumento di ingreso, mientras cu e gastonan mensual di famianan Arubiano ta sigui pisa. Segun Oduber, e problema no ta solamente cuanto ciudadano ta gana, sino principalmente cuanto e mester paga pa biba.

Oduber ta señala tres factor principal cu ta pone presion riba presupuesto familiar: BBO, transporte y vivienda.

Segun e lider di PPA, BBO ta contribui na costo halto di producto y servicio, particularmente den un economia dependiente di importacion. P'esey e ta aboga pa evalua alternativanan fiscal cu por alivia e carga riba consumidor y empresa.

Oduber a indica cu algun trahado ta gasta entre Afl. 300 y 450 mensual na transporte. Un sistema di transporte publico mas eficiente y accesibel por reduci e gasto aki considerablemente. Tambe e ta expresa preocupacion tocante costo di construccion, reparacion y mantencion di vivienda. “No ta suficiente pa pueblo haya mas placa, si Gobierno no ta haci nada pa e placa ey dura mas largo,” Oduber a enfatisa.

Segun e, Gobierno mester combina medidanan salarial cu solucionnan structural pa reduci costo di bida y mehora poder di compra di famianan.