WEB: Storing electrico na WEB a causa blackout di mas cu dos ora na Aruba

ORANJESTAD — Un storing den sistema electrico di WEB Aruba durante testnan regular riba e sistema di proteccion di voltahe halto a causa e blackout di diahuebs 5 di november, cu a afecta henter Aruba. Segun WEB, e storing a provoca perdida di conexion cu dos transformador conecta na e motornan di planta RECIP IV, causando un perdida substancial di produccion di coriente.

E blackout a cuminsa rond di 2'or di merdia. Despues di un ora a logra cuminsa recupera suministro, mientras cu restauracion completo a dura dos ora y 23 minuut.

WEB a anuncia un investigacion mas profundo pa determina e causa exacto di e storing. Actualmente produccion ta stabil, pero e compania lo mantene vigilancia adicional.

WEB a ofrece disculpa na comunidad pa e inconveniencia y a gradici su personal y e teamnan di ELMAR pa recuperacion di suministro electrico.