Bucuti & Tara gana premio internacional pa miho servicio na Merca y Caribe

ORANJESTAD — Bucuti & Tara Beach Resort na Eagle Beach a gana e premio pa Miho Servicio na Norte America (Merca y Caribe) durante e Condé Nast Johansens Awards for Excellence 2027, un reconocemento internacional den industria di hospitalidad di luho.

Fundador y doño di e resort, Ewald Biemans, a ricibi e premio personalmente durante un ceremonia na Londres, Inglatera, riba 2 november 2026.

E reconocemento ta basa riba opinionnan di huespednan, votacion online y evaluacionnan di expertonan internacional den hospitalidad. "Nos ta sinti nos profundamente honra di ricibi e reconocemento aki. E premio ta un tributo na nos team extraordinario", Biemans a declara, destacando dedicacion di su empleadonan y e experiencia personalisa cu resort ta ofrece.

Bucuti & Tara, conoci pa su ambiente romantico exclusivo pa adultonan, ta sigui inverti den renovacion di cambernan, gastronomia y bienestar bou di liderazgo di directora general Crescenzia Biemans, nieta di e fundador.

Entre e innovacionnan ta e restaurant Terra by Jeremy Ford y un programa di bienestar cu ta inclui yoga, meditacion y actividadnan fisico.

E resort, cu na 2018 a bira e prome den Caribe cu certificacion CarbonNeutral, tin tambe varios otro reconocemento internacional, incluyendo premionan di Tripadvisor, Condé Nast Traveler y Travel + Leisure.

E distincion nobo ta pone un biaha mas Aruba den atencion internacional como destinacion pa turismo di luho y hospitalidad di calidad.