Ministerio Publico ta lamenta cu a pospone caso di brug di Renaissance

ORANJESTAD - Ministerio Publico ta lamenta profundamente cu a bolbe pospone e caso penal relaciona cu e accidente grave di trafico cu a tuma lugar riba brug di Renaissance dia 4 di januari 2026. Asina e la reacciona diahuebs, un dia despues cu e caso a keda ‘trata’. Ministerio Publico a spera y a confia cu e caso contra e sospechoso Chania Fernandez Pedra por a wordo trata ayera den su contenido, pa por yega na claridad pa tur parti envolvi. Esey ta no solamente na interes di e sospechoso su mes, sino sigur tambe pa e victimanan y e famia y pa comunidad di Aruba. Tanto e sospechoso, como e victimanan y comunidad tin ya caba 10 luna wardando riba un terminacion definitivo di e caso pisa aki, cu a costa bida di dos persona.

Fernandez Pedra, kende ta wordo persegui pa homicidio y intento di homicidio, a presenta atrobe sin abogado den Corte. Durante e tratamento e sospechoso a dicidi alavez pa wraak e hues. Mañan e peticion aki lo wordo trata pa wrakingskamer. Den anticipacion hues a determina un fecha nobo pa e tratamento di e caso: 18 di november pa 1:30 di atardi. E sospechoso a sigui den detencion preventivo.