Vroegop: AZV no por exigi mas cuido di hospital sin paga pe

ORANJESTAD — Apesar cu Horacio Oduber Hospital (HOH) a ricibi 15 miyon florin di AZV e siman aki, director Jacco Vroegop ta adverti cu e problema financiero structural di hospital ainda no ta soluciona. Si AZV reinicia descontanan di adelanto na december, hospital por enfrenta atrobe problema serio di liquidez, cu posible consecuencia pa continuidad di cuido medico. Vroegop a confirma riba su cuenta di linked-in, cu diamars a bolbe reuni cu Minister di Salubridad Mervin Wyatt-Ras, pero cu despues di lunanan di negociacion, ainda no tin un solucion duradero.

HOSPITAL NO POR NENGA CUIDO URGENTE

Segun Vroegop, HOH durante e ultimo añanan a brinda mas cuido cu e compensacion cu e ta ricibi di AZV. Hospital casi a bira dos biaha mas grandi den tamaño, mientras cu demanda pa cuido, complexidad di tratamentonan y gastonan di medicamento, material y transporte a aumenta considerablemente. "Aruba tin solamente un hospital general. Si un persona mester asistencia urgente, haya cancer, mester duna lus of mester dialisis, nos no por bisa: presupuesto a caba, bolbe otro aña", Vroegop a splica.

AZV NO POR SPERA MESUN CANTIDAD DI CUIDO SIN PAGO

Segun e director, e problema fundamental ta cu AZV no por spera e mesun cantidad di cuido, mucho menos mas cuido, sin paga suficientemente pa esaki.

15 MIYON TA SOLAMENTE UN ALIVIO TEMPORAL

E pago reciente ta compensacion parcial pa cuido brinda durante 2025 y ta permiti HOH paga cuenta atrasa na proveedornan y evita restriccionnan nobo riba operacionnan y tratamentonan planea. Vroegop a aclarea cu adelantonan anterior di AZV no ta placa adicional, sino pagonan di presupuesto futuro cu hospital a ricibi mas tempran. Segun e, si AZV bolbe desconta e adelantonan aki for di pagonan regular na december, e mesun problema financiero por ripiti su mes.

INVESTIGACION TA RESPALDA PREOCUPACION DI HOH

Un investigacion (ainda den concepto) di Deloitte, realisa den encargo di AZV, ta confirma segun Vroegop cu diferente aumento di gasto no a wordo suficientemente incorpora den tarifanan y compensacion fijo di hospital. A base di e resultado aki, HOH a presenta un reclamacion financiero na AZV, cu a resulta den e prome pago di 15 miyon florin.

VROEGOP TA PIDI INTERVENCION DI MINISTER

E director ta exigi pa AZV compensa e cuido brinda durante 2025 y 2026 correctamente y pa yega na acuerdonan cla tocante cantidad, calidad y costo di cuido pa futuro. Vroegop ta referi na articulo 39 di Landsverordening AZV y ta sostene cu minister di Salubridad por uza articulo 2a di e ley pa duna AZV un instruccion general. Segun e, gravedad di e situacion ta hustifica cu minister por considera uza su facultadnan legal pa acerca un solucion structural.

"E CUENTA NO MAG CAI RIBA PACIENTE"

Vroegop ta enfatisa cu no ta su intencion pa crea conflicto cu AZV of Gobierno. "Mi no tin necesidad di un pelea y mi ta prefera dedica mi tempo na mehoramento di cuido", e director a declara. Sinembargo, e ta insisti cu tur instancia involucra mester asumi nan responsabilidad. "E cuenta di financiamiento insuficiente no mag termina cerca di paciente", Vroegop a conclui. Cu december acercando, HOH ta spera cu negociacionnan cu AZV y Gobierno por resulta den un solucion duradero pa evita cu problema financiero bolbe pone presion riba cuido medico na Aruba.