Pieters(PPA): Vacation rental no por perhudica vivienda di Arubiano

ORANJESTAD — Parlamentario Eduard Pieters di PPA ta critica crecemento sin suficiente regulacion di vacation rental na Aruba, alertando cu inversionistanan di exterior ta competi cu compradornan local y ta haci vivienda menos accesibel, specialmente pa hobennan.

Segun Pieters, Gobierno conoce e problema desde basta tempo, pero awor ta introduci un sistema di registracion sin suficiente claridad tocante e base legal, condicionnan, control y proteccion di dato personal.

PPA ta apoya comerciantenan local cu ta genera entrada cu vacation rental, pero ta exigi regulacion cu ta protega mercado di vivienda y garantisa cu e sector ta contribui adecuadamente na economia y bienestar di Aruba.

Pieters ta enfatisa cu registracion so no ta suficiente: Gobierno mester pone regla y limite pa evita cu crecemento turistico ta bay na costo di e Arubiano cu kier cumpra su prome cas.