Tour Operators Uni ta logra avance cu GPS y reglanan pa proteha naturalesa

ORANJESTAD — Tour Operators Uni a anuncia cu den cinco siman di colaboracion cu Gobierno di Aruba, e sector a logra avance den desaroyo di reglanan pa excursionnan turistico den naturalesa.

E operadornan a presenta un protocol cu ta propone GPS obligatorio den vehiculonan comercial di tour, control di velocidad, capacitacion di guia y sancionnan pa violacion di e reglanan, incluyendo suspension di participacion den e protocol.

Na Tera Cora, e sector a contribui na un propuesta temporal cu aproximadamente 27 punto, cu ainda ta pendiente di aprobacion. SETAR a instala un sistema GPS piloto na ABC Tours pa facilita monitoreo di rutanan.

Tour Operators Uni ta enfatisa cu operadornan cu licencia ta uza camindanan di tera existente y no ta core libremente den naturalesa. E organisacion ta pidi control mas estricto riba operadornan ilegal y vehiculonan di huur sin guia.

E sector ta insisti riba formacion di un taskforce cu Gobierno, ATA y organisacionnan ambiental, y a renova su invitacion na Aruba Birdlife Conservation pa participa den e dialogo.