Peaton alcansa na Pos Chikito ta bira e di 14 morto den trafico

POS CHIKITO — Julian Rambalde, di 63 aña, a fayece na hospital diaranson 14 di october, despues cu un van a alcanc’e dia 5 di october riba caminda principal di Pos Chikito, cerca di Rey Hing. Su morto ta trece e total di victimanan mortal den trafico na Aruba na 14 pa 2026, segun Cuerpo Policial Aruba.

E accidente a tuma luga pa mas o menos 7:41 di anochi. Paramediconan a stabilisa Rambalde na e sitio y a transport’e cu urgencia pa hospital, caminda el a keda interna den cuido intensivo den condicion critico.

Segun informacion preliminar di polis, un Hyundai Staria blauw cu tabata circula direccion pariba a alcansa e peaton. Specialistanan di trafico y polis tecnico a investiga e accidente.

Rambalde a nace na Republica Dominicana dia 20 di februari 1963. KPA a expresa condolencia na su famia y ta pidi automobilistanan pa baha velocidad, presta atencion y respeta reglanan di trafico.