Corte ta pospone caso di off-road: ABC y tour operadornan mester sinta cu Gobierno

ORANJESTAD — Apesar di e obhecion di Aruba Birdlife Conservation (ABC), Corte di Prome Instancia a aproba e peticion di Gobierno pa pospone  e caso tocante trafico motorisa den areanan natural atrobe. E tratamento, cu tabata programa pa 15 di october, awor lo tuma luga diahuebs 12 di november 2026, pa 2:30 di atardi. Den su decision di 14 di october, huez A.H.M. van de Leur ta indica cu e posponemento ta hustifica considerando e interesnan importante di e partidonan, di esnan cu a pidi participa den e proceso y di comunidad Arubano en general. E huez tambe ta duna peso na e intencion di Gobierno pa sigui conversa fuera di Corte cu ABC y un representante di e touroperadornan hunto.

DEN PRINCIPIO, NO TIN MAS POSPONEMENTO

Corte ta pone un limite na e tempo adicional. E caso ta wordo pospone, segun e decision, “den principio, sin posibilidad di un posponemento adicional”.

E fecha nobo a wordo determina teniendo cuenta cu agenda di huez y e fechanan cu FPNA a indica cu e no ta disponibel. E condicionnan anteriormente establece pa e posponemento ta sigui aplica. Ademas, Van de Leur ta expresa cu e ta spera di ABC y un representante di touroperadornan pa nan acepta e prome invitacion di Gobierno, y posiblemente invitacionnan adicional, pa participa hunto den un dialogo constructivo.

DECISION TA BINI DESPUES DI RECHAZO FUERTE DI ABC

E decision ta sigui e carta di abogado G.W. Rep cu Noticiacla a trata anteriormente. Den e carta ey, ABC a rechasa mas posponemento y a argumenta cu e conversacionnan cu Gobierno no a produci un proposicion suficiente pa protegi e areanan natural. Rep a scirbi: “Pa un posponemento adicional pa duna e partidonan oportunidad di sinta na mesa, no tin ningun motibo.” E abogado tambe a sostene cu Corte anteriormente a pidi ABC pa conversa cu Gobierno, no cu touroperadornan. El a menciona menasanan contra Greg Peterson y su famia como un motibo pakico Peterson no kier participa voluntariamente den e conversacionnan cu e grupo menciona. Den e decision nobo, sinembargo, huez ta expresa claramente e expectativa pa ABC y un representante di touroperadornan sinta simultaneamente cu Gobierno.

DISPUTA TOCANTE PROTECCION DI NATURALEZA TA SIGUI PENDIENTE

ABC a presenta un proposicion cu ta combina ceramento di cierto area cu acceso temporal y condiciona pa UTV den otro zona. E fundacion tambe ta sostene cu consehonan di DOW, DIP y DNM ta apoya proteccion di areanan sensitivo y uzo di rutanan alternativo.

E decision di 14 di october no ta determina si e acusacionnan di ABC contra Minister Herdé ta correcto, ni ta resolve cua area mester keda habri of cera. E ta un decision procedural pa duna mas tempo na dialogo, mientras e disputa principal ta sigui pendiente.