Hospital di Aruba ta entrena dokternan pa amplia uzo di ecografia den cuido

ORANJESTAD — HOH Academy a reuni profesionalnan di salud di Aruba, Corsou y Hulanda durante Caribbean Echo Congress, cu a tuma luga di 5 te 9 di october. E evento, organisa hunto cu Dutch Emergency Ultra Sound (DEUS), a combina teoria y practica den ecografia na punto di cuido (POCUS).

E entrenamento a inclui examen di curason, pulmon, riñon y otro organonan, cu boluntarionan como modelo. E programa tabata dirigi tanto na principiante como na profesional cu experiencia y a ofrece 18 punto di acreditacion pa specialistanan medico.

Dokter Els van Leest a indica cu e tecnica ainda no ta completamente incorpora na Aruba: “Nos kier acelera su uzo.”

Internista Jaclyn de Kort a enfatisa cu ecografia por yuda brinda miho cuido: “E ta yuda nos pa haci nos trabou mas facil y pa yega na diagnosticonan mas exacto.”