Pieters (PPA) : Salario minimo mas halto por perde balor si prijs subi

ORANJESTAD — Parlamentario di PPA Eduard Pieters ta adverti cu un aumento fuerte di salario minimo no necesariamente ta mehora poder di compra si empresanan pasa e costonan adicional pa consumidor.

Pieters ta sostene cu e diferencia entre salario minimo y bestaansminimum — e entrada necesario pa cubri gastonan basico — mester cera, pero cu un analisis completo di e consecuencianan. “Claro cu nos mester cera e gap,” el a expresa.

Segun Pieters, costo di importacion, e efecto acumulativo di BBO y un aumento di costo laboral por pone mas presion riba prijs. E tambe ta señala cu un salario minimo mas halto por genera peticionnan di ahuste di supervisor y manager.

“Comerciante no ta bay sali perdi. E ta calcula esaki den su prijs. Y na final, nos como pueblo tin cu paga,” el a declara.

Pa Pieters, e exito di e medida mester wordo midi pa loke trahadornan realmente por cumpra, y no solamente pa e cifra riba nan slip di pago.