Aruba Birdlife Conservation: Minister Herdé ta ignora conseho di su propio expertonan

ORANJESTAD — Aruba Birdlife Conservation (ABC) a rechasa un peticion nobo di Gobierno pa pospone e caso tocante trafico motorisa den areanan natural. Den un carta di su abogado G.W. Rep na huez A.H.M. van de Leur, fecha 14 di october, e fundacion ta sostene cu Minister Herdé ta actua contra conseho di su propio funcionarionan, y ta pidi Corte pa trata e caso cu urgencia.

E carta, cu Noticiacla a ricibi como un pieza exclusivo, ta presenta un conflicto cu ta bay mas leu cu un desacuerdo entre Gobierno y un organisacion ambiental. Segun abogado Rep, documentonan cu ABC a ricibi dia 13 di october ta mustra cu DOW, DIP y DNM ya a conseha riba zonanan cu mester keda cera pa off-road y rutanan alternativo. “Pa un posponemento adicional pa duna e partidonan oportunidad di sinta na mesa, no tin ningun motibo,” Rep ta scirbi. E tratamiento di e caso ta programa pa 15 di october, pa 2 or di atardi.

CONSEHO DI DOW, DIP Y DNM TA PONE LIMITE

Segun e carta, e directornan di DOW, DIP y DNM a manda Minister Herdé un conseho conhunto dia 24 di september. Den esaki nan ta referi na investigacion di campo, experticio tecnico y un proceso interdepartamental cu a resulta den recomendacionnan desde 2022. E tres zonanan identifica como no-go ta Faro–Alto Vista, Natural Bridge–Indjek/Blackstone Beach y e caminda di santo di Sero Colorado–Rode Anker. E estudio tambe a propone tres ruta pa off-road.

Den e fragmento di e conseho cita pa e abogado, e directornan ta sostene cu rutanan anteriormente propone y proteccion duradero di Tera Cora mester forma e punto di salida. Desvia di esakinan, segun nan, ta rekeri un decision administrativo explicitamente motiva, basa riba hecho nobo of circunstancianan cambia y siguiendo e proceduranan legal.

ABC ta afirma cu e no tabatin conocemento di e consehonan aki y cu tampoco a ricibi nan mediante su peticionnan di informacion.

ABC A PROPONE ZONANAN CERA Y ACCESO LIMITA

Rep ta rechasa e impresion cu ABC no a contribui na un solucion. Segun e carta, dia 11 di september e fundacion a entrega un proposicion concreto na minister.

E proposicion ta inclui ceramento pa trafico motorisa di Tera Cora te e prome rancho, y di tur e area despues di Natural Bridge, incluyendo Andicuri. Bushiribana–Natural Bridge por keda habri. Pa Alto Vista–Bushiribana, ABC ta propone acceso temporal y condiciona pa UTV, cu reduccion gradual, control di velocidad, GPS, limite di vehiculo y medidanan contra zonido y stof.

Pero segun Rep, e encuentronan siguiente no a trece un proposicion concreto di Gobierno cu por forma base pa un acuerdo.

PROPOSICION PA TERA CORA TA PROFUNDISA E CONFLICTO

Un documento prepara door di ACF y manda pa minister dia 9 di october ta, segun ABC, limita su enfoke na Tera Cora y no ta contesta e peticionnan pa protegi otro area. Rep ta critica particularmente e proposicion pa aplica DirtGlue riba un caminda den e area natural. E abogado ta describi esaki como “un sla den cara di ABC” y ta argumenta cu e enfoke ta duna otro interes prioridad riba proteccion di naturaleza.

E carta tambe ta cuestiona si e documento a wordo prepara cu inteligencia artificial, citando un respuesta di ChatGPT. E respuesta ey, sinembargo, no ta prueba confiabel di autoria ni di falta di investigacion.

MENASA TA AFECTA POSIBILIDAD DI DIALOGO

Rep a informa huez cu Greg Peterson y su famia ta ricibi menasanan den nan bida personal. E ta cita esaki como un motibo pakico Peterson no kier participa boluntariamente den conversacion cu e grupo di touroperadornan menciona den e carta. Segun e abogado, Corte a pidi ABC pa sinta cu Gobierno; pero e no a determina cu e fundacion mester negocia cu touroperadornan.

“Un solucion caminda naturaleza ta wordo tuma na serio no lo wordo haya cu e minister aki como partner di dialogo,” Rep ta conclui.

Cu esaki, ABC ta pidi pa e proceso sigui den Corte. E acusacionnan y interpretacionnan ta di e fundacion y su abogado; e carta no ta un sentencia. Den e material ricibi no tin un reaccion di Minister Herdé ni di Gobierno riba e señalamientonan.