Christa Pike ta sigui den condicion critico despues di sobreviví ehecucion

NASHVILLE — Christa Pike ta den condicion critico y ta ricibi tratamento medico pa salba su bida, despues cu e la sobreviví e intento di Tennessee pa ehecut’é cu inyeccion letal diaranson.

Pike, condena na morto pa asesinato di Colleen Slemmer di 19 aña na 1995, a ricibi dos dosis di pentobarbital cu tabata destina pa causa su morto. Sinembargo, despues di e procedimiento e tabata ainda bibo. Su abogadonan no a duna mas detaye tocante su condicion medico.

Pike tabata pa bira e prome muher ehecuta na Tennessee den aproximadamente 200 aña. Awor, su futuro medico y legal ta keda incerto.

Gobernador Bill Lee a anuncia cu e ultimo ehecucion cu Tennessee tabatin programa pa e aña aki lo no sigui dilanti mientras un investigacion independiente ta determina exactamente kico a pasa durante e intento cu Pike.

Testigonan di prensa cu tabata presente a conta cu Pike a duna su ultimo palabranan alrededor di 7:26 di anochi. Pero despues di administra e drogannan, e tabata ainda hala rosea y aparentemente bibo. Un periodista cu a cubri varios otro ehecucion a describi e situacion como algo completamente abnormal.

Departamento di Correccion di Tennessee ta sostene cu su personal a sigui tur paso di e protocolo oficial y cu no tabatin ningun otro procedimiento autorisa despues di administra e dosisnan.

Abogadonan di Pike ta pidi Gobernador Lee pa cambia su sentencia di morto. Nan ta bisa cu nan a adverti prome cu problema pa haya acceso na su venanan por complica e procedimiento y cu loke a pasa confirma e preocupacionnan ey.

E caso por habri un discusion legal excepcional. Den pasado tabatin prisioneronan cu a sobrevivi un prome intento di ehecucion y despues a enfrenta un segundo intento. Pero segun expertonan, caso di Pike ta diferente pasobra e drogannan letal efectivamente a drenta den su curpa y, apesar di esey, e a sobrevivi.