Casnan di cuido na Aruba lo haya Maneho di Calor pa proteha adultonan mayor

ORANJESTAD — Gobierno, hunto cu diferente instancia nacional y internacional, a introduci oficialmente un Maneho di Calor pa casnan di cuido, cu meta di proteha adultonan mayor contra riesgonan di salud durante periodonan di calor intenso.

E maneho ta enfoca riba prevencion y accion na tempo, teniendo cuenta cu adultonan mayor ta mas vulnerabel pa calor, entre otro pa motibo di edad, condicionnan cronico y uso di cierto medicamento.

Como parti di e sistema, casnan di cuido lo haya stacionnan meteorologico gratuitamente pa monitorea temperatura y humedad. E datonan lo wordo comparti directamente cu Departamento Meteorologico Aruba.

Ora e hitte-index yega of pasa e limite determina durante varios dia consecutivo, DMA y Directie Ouderenzaken lo manda un advertencia pa activa e Protocol di Calor.

Personal di cuido tambe lo haya material informativo pa reconoce señalnan di stress debi na calor, agotamento y ataka di calor, y pa sa con actua na tempo.

E programa ta cuminza cu casnan di cuido pa adultonan mayor, pero tin intencion pa amplia esaki den futuro pa otro localidadnan y areanan publico cu adulto mayor ta frecuenta.