Encuesta: 64% no ta considera Wendrick Cicilia prepara ainda pa lidera AVP

ORANJESTAD — Mayoria di participantenan den un encuesta di Noticiacla no ta considera Wendrick Cicilia prepara ainda pa asumi liderazgo di AVP, mientras apenas 16% ta indica cu nan si ta mira e como suficientemente prepara pa e posicion.

E encuesta, cu a registra 380 respuesta, a wordo haci den anticipacion di e transferencia di liderazgo di Mike Eman na Cicilia durante Congreso di AVP dia 4 di october. E transferencia a wordo anuncia oficialmente y AVP a indica cu e congreso lo formalisa e cambio di liderazgo. AVP

Riba e pregunta directo si Cicilia ta prepara pa lidera AVP, 64.3% a contesta “no”, mientras 16.1% a bisa “si”. Otro 11.9% ta considera cu ainda ta demasiado tempran pa bisa, mientras 7.7% a indica cu nan no conoce su trabou suficientemente   pa forma un opinion.

E resultado ta conecta cu un otro pregunta tocante e cambio di liderazgo mes. 49.6% di e participantenan a bisa cu nan no ta positivo tocante e cambio, compara cu 16.6% cu ta positivo. Un otro 24.0% ta neutral y kier wak con situacion ta desaroya, mientras 9.8% no tin suficiente informacion pa opina.

Tocante e perfil politico cu comunidad ta mira den Cicilia, e resultado ta mustra cu ainda tin hopi incertidumbre. 56.6% a bisa cu ainda ta demasiado tempran pa determina si e lo continua e linea di Mike Eman of si e lo forma su propio identidad politico.

22.5% ta mira Cicilia principalmente como e sucesor cu lo continua e linea di Eman, 10.1% como un lider cu su propio identidad y 10.8% como un combinacion di ambos.

E encuesta tambe a midi confianza den Cicilia si den futuro e eventualmente bira candidato pa Prome Minister. 44.9% a indica cu nan no tin ningun confianza den dje den e rol ey y 28.2% tin poco confianza. Hunto, esaki ta representa 73.1% di e contestanan valido.

Di otro banda, 15.3% a expresa bastante of hopi confianza, mientras 11.6% a bisa cu nan no conoce Cicilia suficientemente pa evalua.

Un di e mensahenan mas cla den e resultado ta cu, pa un parti grandi di e participantenan, liderazgo di partido y liderazgo di pais no ta necesariamente e mesun cos. 55.0% a contesta cu ser lider di AVP no ta significa automaticamente cu Cicilia mester bira siguiente Prome Minister, mientras otro 32.5% ta considera cu otro opcionnan mester wordo evalua.

Solamente 11.6% a indica cu nan ta considera cu lider di AVP si mester bira siguiente Prome Minister.

E encuesta no ta un muestra cientificamente pondera di electorado completo di Aruba. E ta un encuesta online entre lectornan y participantenan di Noticiacla y, consecuentemente, e resultado ta representa opinion di e grupo cu a participa.