Fernandez Pedra ta rechasa abogado atrobe, y pidi disculpa na famianan

ORANJESTAD — “Mi kier bolbe bisa cu mi tin duele pa e famianan. Nunca mi a desea esaki.” Cu e palabranan aki, traduci for di su declaracion durante e audiencia, C. Fernandez Pedra a dirigi su mes na e huez diabierna mainta den e caso di hit and run di 4 di januari 2026, unda dos peaton a perde nan bida. Durante e intercambio, huez a confirma cu e caso no lo wordo trata di fondo durante e sesion aki, pa falta di abogado.

DOLOR CAUSA

Fernandez Pedra a expresa cu e ta consciente di e dolor cu e sucedido a causa y cu e no kier minimisa e sufrimento di e famianan. E a bisa tambe cu ta dificil pe procesa loke a pasa y expresa su sintimentonan den palabra. “Mi no kier busca excusa,” e la declara. “Esaki no ta compara cu e dolor cu e famianan ta pasando aden.” E conversacion entre huez y acusado a wordo interumpi varios biaha pa problema di conexion. Huez a ripiti y resumi parti di su declaracion pa confirma cu su mensahe a wordo comprendi correctamente.

RAPPORT PSICOLOGICO TA CLA

Durante e audiencia, huez a informa cu diferente documento nobo a drenta e dossier desde e sesion anterior. Entre nan tin un proceso-verbaal cu ta describi con e computer di e auto a wordo obteni y manda Hulanda pa investigacion. E documento ta trata e cadena di custodia: e registro di con e material a wordo maneha y transferi. Tambe e rapport psicologico ta cla. Segun huez, preparacion di e informe a dura mas largo cu tabata spera, pero awor Corte a ricibie. E contenido y conclusionnan di e rapport no a wordo detaya den e intercambio aki. Anteriormente, Noticiacla a raporta cu tanto e investigacion tecnico riba e sistema electronico di e vehiculo como e informe psicologico tabata puntonan pendiente den e proceso.

PETICION PA SUSPENDE DETENCION

Huez a confirma tambe cu Corte a ricibi un carta firma pa Fernandez Pedra, cu segun e documento a wordo prepara pa señor Moszkowicz na Hulanda. E carta ta contene un peticion pa suspende su detencion preventivo y un peticion pa no trata e caso di fondo durante e audiencia. Riba e ultimo punto, huez a aclara cu esaki ya tabata e situacion: e sesion no tabata pa tratamento di fondo. Den e parti di e audiencia describi aki, no a anuncia un decision riba e peticion pa suspende detencion.

ACUSADO A NENGA ABOGADO

Un parti central di e intercambio tabata e falta di asistencia legal efectivo. Segun huez, durante e prome dos encuentro no tabatin un abogado presente. E acusado tabatin un abogado anteriormente, pero a termina e relacion cu esaki. Despues, riba peticion di e acusado, a busca y haya un otro abogado dispuesto pa asumi e defensa.

FERNANDEZ PEDRA A RECHASA ABOGADO ATROBE

Sinembargo, awor Fernandez Pedra a indica cu no kier e abogado aki tampoco. Huez a enfatisa cu ta trata di un abogado specialisa den derecho penal, cu experiencia, y cu e motibo pa rechaza su asistencia no tabata cla. “Si bo no kier e abogado, ta bo decision. E ora e bala ta den bo cancha,” huez a indica, haciendo cla cu e responsabilidad pa regla defensa awor ta na e acusado.

NO POR SIGUI POSPONE E CASO

Huez a subraya cu e proceso no por sigui wordo pospone indefinidamente pa motibo di e cuestion di abogado. “Ta bira tempo pa e caso aki finalmente wordo trata integralmente,” e la expresa. E la agrega cu tanto e acusado como e caso mes ta merece un tratamento adecuado. “Mi no por sigui warda sin fin te ora un abogado por wordo instala. Percura pa bo tin un abogado,” tabata su advertencia pa e proximo sesion.

FISCAL A RABIA

Dado momento fiscal a hiba palabra y a dirigi su mes den direccion di e acusada, bisando e cu e no ta di acuerdo cu e proceso di tardansa. ‘E famianan mester di un aclaracion, pueblo mester di aclaracion. Tin cuater periodista aki cu kier aclaracion y cu mester informa comunidad. Mi no ta compronde kico e problema ta. Nos tin confirma cu ningun abogado na Aruba kier tuma bo caso. Ningun abogado na Corsou kier tuma bo caso. Dus bo tin e informacion ey caba. Kico bo ta bay haci awor?” e fiscal a bisa. Atrobe e acusada a sigura cu e tin dos nomber di abogado, cu despues di consulta cu famia, lo keda presenta na Corte. 

E CASO

E caso ta relaciona cu e impacto fatal riba L.G. Smith Boulevard. Ministerio Publico ta acusa Fernandez Pedra, entre otro, di homicidio di dos persona, dos intento di homicidio, bandona lugar di accidente, conduci bao influencia di alcohol y stuur sin rijbewijs valido. E acusacionnan ainda mester wordo evalua pa Corte; e expresionnan di duele durante e audiencia no ta constitui un sentencia ni un determinacion di culpabilidad.