Corte di apelacion ta aumenta multa pa Nagico Aruba na casi Afl. 4,3 miyon

ORANJESTAD — Nagico Aruba N.V. y Nagico Life Insurance (Aruba) N.V. mester paga hunto casi Afl. 4,3 miyon na multa pa 19 violacion relaciona cu integridad, maneho corporativo y seguridad di IT. Gemeenschappelijk Hof cu esaki a deshaci pa gran parti e reduccion di multa cu Corte di Prome Instancia a aplica anteriormente.

Centrale Bank van Aruba (CBA) a impone originalmente casi Afl. 6 miyon na multa na 2023. Na principio di 2025, Corte di Prome Instancia a baha e suma na casi Afl. 2,2 miyon, pero tanto Nagico como CBA a apela.

Hof awor ta conclui cu CBA tabatin base pa trata e 19 falta como violacion separa y, en principio, impone un multa pa cada uno.

Entre e faltanan constata tabatin conflicto di interes, falta di un compliance officer claramente identificabel, control insuficiente di funcionnan sensitivo pa integridad y supervision deficiente door di Raad van Commissarissen. Tambe a identifica problema serio den maneho di riesgo y seguridad di IT, incluyendo control insuficiente di acceso na sistemanan.

Sinembargo, Hof no a mantene e multa original di casi Afl. 6 miyon. Pasobra diferente violacionnan tin relacion cu otro, e hueznan a aplica un reduccion adicional di 25%. Despues di otro reduccionnan pa disposicion di mejora y capacidad financiero, cada un di e dos companianan mester paga poco mas cu Afl. 2,13 miyon.

E sentencia tin un importancia mas amplio pa supervision financiero na Aruba. Hof a confirma cu directivanan di CBA tocante integridad y corporate governance, ora nan ta keda dentro di e autoridad legal di Banco Central, por tin caracter obligatorio y violacion di nan por wordo castiga separadamente.