Wardacosta ta detene sospechoso pa ladronicia di pipa di koper cerca di ex refineria di Aruba

ORANJESTAD — Wardacosta di Caribe Hulandes a detene un persona diasabra marduga 26 di september, despues di un aviso tocante movecion sospechoso den bisindario di refineria.

Na e momento ey, un unidad Metal Shark tabata patruyando riba lama. Centro Maritimo Operacional a manda e boto den direccion di refineria y simultaneamente a pidi asistencia di un avion Dash-8 di Wardacosta.

E avion a localisa dos persona y a guia e unidad riba lama pa nan posicion. Ora Wardacosta a acerca, nan a logra detene un sospechoso, mientras e otro persona a huy.

Segun Wardacosta, e personanan tabata envolvi den ladronicia di diferente pipa di koper. E sospechoso deteni a wordo entrega na KPA, cu lo sigui cu investigacion.

Wardacosta a gradici comunidad pa e aviso y ta recorda publico cu pa emergencia riba lama of movecion sospechoso por yama 913.