San Nicolas Pop-Up Market ta celebra prome aniversario cu mas di 60 vendor

ORANJESTAD — San Nicolas Pop-Up Market lo celebra su prome aniversario e diasabra aki, 26 di september, na Plaza Lolita. Loke a cuminsa na september 2025 cu solamente 13 vendor y artesano local, awe a crece pa bira un mercado mensual cu mas di 60 participante.

E mercado a wordo crea pa duna comerciante, productor y artesano local un plataforma accesibel pa presenta y bende nan producto, amplia nan clientela y genera entrada. Cu sosten di Ministerio di Finansa, Asunto Economico y Sector Primario y District Advisor Rondel Heyliger, participacion a sigui crece durante e ultimo aña.

Na Plaza Lolita, bishitantenan por haya artesania, producto agricola local, cuminda, bebida y otro producto di comerciante y productor local, combina cu musica y un ambiente familiar.

Segun Minister Geoffrey Wever, e Pop-Up Market ta forma parti di un vision mas amplio pa revitalisa centro di San Nicolas door di crea actividad economico, atrae mas hende y fortalece negoshinan chikito.

Actualmente tin mas di 50 vendor y artesano riba lista di espera, y Gobierno tin plan pa amplia e mercado ainda mas.

E celebracion di aniversario lo tuma luga e diasabra 26 di september di 9:00 di mainta te 2:00 di atardi na Plaza Lolita.