Savaneta Seafood Festival ta bolbe diadomingo cu enfoke riba pesca local y oportunidad economico

ORANJESTAD — E di dos edicion di Savaneta Seafood Festival lo tuma luga e diadomingo aki, 27 di september, di 11’or di mainta te 7’or di anochi. E festival lo pone pesca, gastronomia, cultura y comunidad di Savaneta den centro, mientras ta crea un plataforma pa piscadonan, productornan y empresarionan local.

Despues di e prome edicion na 2025, Fundacion Savaneta Prome Capital ta organisa e evento nuevamente den colaboracion cu Ministerio di Finansa, Asunto Economico y Sector Primario y diferente partnernan publico y priva.

Publico por disfruta di seafood, preparacion culinario, musica live, artesania y diferente actividad familiar. Segun Minister Geoffrey Wever, e festival ta forma parti di un maneho mas amplio pa fortalece sector primario y crea mas actividad economico rond di pesca y produccion local.

Wever a destaca inversionnan den piernan pa piscadonan na Savaneta y otro lugar, ademas di Programa Piskechi pa muchanan y hobennan entre 10 y 17 aña siña tecnica tradicional di piscamento.

Segun e minister, e meta ta pa pesca local no termina solamente cu captura di pisca, sino genera oportunidad tambe den gastronomia, comercio y emprendemento. Gobierno ta mira e sector primario como parti di su esfuerzo pa diversifica economia y fortalece produccion local.