The Young Voices ta reuni pa honra legado musical di Maybelline Arends-Croes

ORANJESTAD — Siete cantante di The Young Voices lo reuni riba escenario dia 22 di november 2026 pa un concierto di homenahe na nan maestra y mentor, Maybelline Arends-Croes. E presentacion lo tuma lugar na Renaissance Convention Center pa 7:00 di anochi, cu un banda en bibo bou direccion di Carlos Bislip.

E agrupacion a nace na 1978 cu muchanan entre 9 y 14 aña, bou guia musical di Arends-Croes. Durante añanan ochenta, The Young Voices a gana reconocemento cu presentacionnan local y internacional, combinando harmonia vocal, baile y cancionnan den diferente idioma y estilo.

Cu “The Young Voices – The Reunion 2026”, e cantantenan kier reconoce e impacto di Arends-Croes riba nan desaroyo musical y personal, y su contribucion na cultura di Aruba. E repertorio lo trece cancionnan cu ta rebiba recuerdonan di e agrupacion y e amistadnan cu a forma durante e añanan.

Caarchinan ta costa Afl. 100 y ta obtenibel na Citgo Boulevard, Citgo Esso Ville y Citgo Palm Beach.