“Letra y Consenshi” ta conecta historia di sclavitud na Aruba cu lucha contra desinformacion

ORANJESTAD — Documentonan y relatonan tocante sclavitud y emancipacion na Aruba ta forma e base di e exposicion “Letra y Consenshi: Balor Humano di un Pueblo”, cu lo inaugura dialuna 28 di september na Post Aruba N.V. E actividad, di 5:30 pa 7:30 di anochi, ta marca Dia Internacional pa Acceso Universal na Informacion.

E exposicion ta conecta un pasado den cual personanan sclavisa tabatin poco of ningun oportunidad pa registra nan propio experiencia, cu e derecho di awe pa consulta informacion y conoce historia. E ta enfatisa con acceso na documentonan original por yuda verifica hecho, combati desinformacion y duna visibilidad na bosnan cu a keda poco representa den archivo.

E programa ta inclui presentacion di Birgit Kreykenbohm di UNESCO Aruba tocante importancia di e dia; Iliene Corsen di Post Aruba riba berdad den un era di exceso di informacion; y Johny van Eerden di Archivo Nacional Aruba tocante cua bosnan nos ta scucha den archivo. Renwick Heronimo di Biblioteca Nacional Aruba lo presenta e exposicion.

E iniciativa ta reuni institucionnan di patrimonio, informacion y memoria historico, incluyendo UNESCO Aruba, Biblioteca Nacional, Archivo Nacional, Comite Nacional Memory of the World Aruba y Post Aruba. Henter comunidad ta invita pa participa y bishita e exposicion.