Dowers na ONU: conflicto, cambio climatico y desigualdad ta amenaza progreso

NEW YORK — Conflicto, cambio climatico y desigualdad creciente ta pone progreso den desaroyo sostenibel bou di presion. Minister Arthur Dowers a destaca esaki na Nacionnan Uni, unda el a enfatisa cu ningun pais por enfrenta e retonan aki su so.

Dowers a papia den nomber di Reino Hulandes durante e reunion di alto nivel pa conmemora 40 aña di e Declaracion riba Derecho na Desaroyo, den cuadro di e di 81 Asamblea General.

E minister a subraya cu desaroyo sostenibel mester bay hunto cu respet pa tur derecho humano: civil, politico, economico, social y cultural. El a reafirma e compromiso di Aruba, Corsou, Sint Maarten y Hulanda cu Agenda 2030 y un futuro husto, inclusivo y sostenibel.

Dowers a anuncia tambe cu Reino lo presenta su di tres evaluacion nacional voluntario di progreso riba e Metanan di Desaroyo Sostenibel (SDG) na 2027. Hobennan, sector priva y sociedad civil lo participa den e proceso.

Ademas, el a expresa sosten pa reformanan cu mester haci ONU mas representativo y efectivo. Su yamada tabata pa renoba e compromiso internacional pa cada persona tin oportunidad di duna forma na su propio futuro.