MEP ta cuestiona excepcion salarial pa AAA/Schiphol mientras directornan local keda exclui

ORANJESTAD — Fraccion di MEP ta pidi Gobierno AVP-FUTURO splica pakico a duna un excepcion riba e Landsverordening Normering Topinkomens (LNT) pa AAA/Schiphol, mientras directornan di otro companianan estatal, manera SETAR, WEB y ELMAR, segun e partido, no ta haya e mesun posibilidad.

Durante e debate parlamentario, MEP a sostene cu minister Wever a indica cu e excepcion a wordo duna a base di articulo 12, na deseo di ministernan Eman y Cicilia. Segun e fraccion, Wever a declara tambe cu uza e mesun articulo pa otro directornan lo ta incorrecto. MEP ta considera esaki un trato desigual cu mester wordo splica.

E partido ta reconoce cu LNT por mester evaluacion y adaptacion, pero ta exigi criterianan obhetivo, transparencia y un aplicacion consistente. Segun MEP, profesionalnan local no mester keda na desbentaha frente na un profesional di exterior.

MEP a cuestiona tambe e falta di consulta previo cu Hulanda tocante e cambionan proponi. E fraccion a recorda cu LNT a surgi como condicion pa sosten financiero durante pandemia. Parlamentario Edgard Vrolijk a pidi claridad tocante con Gobierno lo trata e revision cu Hulanda.