Hulanda kier curso obligatorio pa doñonan di cacho di riesgo

DEN HAAG — Gobierno di Hulanda kier introduci un curso di comportamento obligatorio pa doñonan di cacho considera di riesgo, pa reduci e cantidad di incidente di mordemento. Staatssecretaris di Agricultura, Erkens, ta indica cu na cuminsamento di 2027 lo anuncia cua rasanan lo cay bou di e medida.

Doñonan lo mester paga e curso nan mes. Ainda no ta conoci ki dia e obligacion lo drenta na vigor ni con lo controla e cumplimento. Tambe ta investiga si esnan cu no sigui e curso por haya un castigo mas pisa den caso di un incidente di mordemento.

Erkens kier ademas un curso pa futuro doñonan, pa yuda nan scoge un cacho apropia y compronde su comportamento, incluyendo señalnan di stress.

Pa pushinan domestico tambe tin un obligacion di chip den preparacion. Segun e plannan, na 2031 lo tin un base di dato europeo pa cacho y pushi, pa facilita identificacion di nan doñonan, tambe otro banda di frontera. Ademas, ta evalua aproximadamente mil especie di reptil pa determina cua ta adecua pa tene como animal domestico.