Periodistanan di Reino ta uni pa debate clima y cooperacion

DEVENTER — Periodistanan di Aruba y otro partinan di Reino Hulandes a participa na e di dos Nederlands Journalistiek Festival, cu a tuma lugar 18 y 19 di september na Deventer. Mas cu 1.000 periodista, creador di contenido y otro interesa a participa na casi 150 panel, charla y taller.

Riba invitacion di Fonds Bijzondere Journalistieke Projecten (Fonds BJP), un delegacion grandi for di e parti Caribense di Reino tabata presente. E participacion a crea mas espacio pa perspectiva Caribense den discusionnan profesional tocante periodismo.

Fonds BJP a organisa dos sesion: uno tocante salud mental y sosten entre colega den periodismo, y otro tocante con periodistanan for di Bonaire te Maastricht ta informa tocante crisis climatico, cu no ta manifesta mescos tur caminda.

Den e debate climatico a participa Rajesh Chintaman di The Daily Herald na Sint Maarten, Radinka Ustasia di Bonaire, Oriana Wouters di Aruba, Maarten van Gestel di Trouw y Emma van Bergeijk di nu.nl. Periodista y escritor Milouska Meulens tabata moderado di e sesion.

Segun Wensly Francisco, experto den periodismo Caribense cerca Fonds BJP, cambio climatico ta un responsabilidad comparti den Reino, pero su consecuencianan ta diferencia di isla pa isla y compara cu Hulanda Europeo. Pesey, periodistanan mester no solamente informa, sino tambe duna contexto for di nan propio realidad.

Fonds BJP ta dedica atencion adicional na periodismo den Caribe Hulandes desde dos aña. Ademas di subsidia proyectonan periodistico profundo, e fondo ta stimula intercambio di conocimiento y cooperacion. Corant Papiamento Extra Curaçao tambe a organisa un sesion tocante colaboracion periodistico den Reino.

Director di Fonds BJP, Joëlle Terburg, a destaca cu tin poco oportunidad pa periodistanan di Aruba, Corsou, Sint Maarten, Bonaire, Saba y Sint Eustatius reuni y intercambia experiencia cu coleganan na Hulanda Europeo. E festival tabatin como meta contribui na relacionnan y cooperacionnan duradero.

Despues di e sesion climatico, programa radial Boneriano Op de Klippen a presenta un edicion special for di Deventer. E episodio lo ta disponibel online dentro di algun dia.