Fitch: Economia di Aruba supera expectativa y debe ta sigui baha

ORANJESTAD — Fitch Ratings ta mira un desaroyo positivo den economia y finansa publico di Aruba. Den su ultimo actualisacion, e agencia ta indica cu crecemento economico ta supera expectativa, Gobierno ta registra surplus fuerte y debe nacional ta sigui baha. Aruba ta mantene su rating BBB cu outlook positivo. Asina minister di finanza Geoffrey Wever ta bisa den su comunicado. 

Segun e rapport, Wever ta bisa cu Centrale Bank van Aruba a revisa crecemento real di PIB pa 2025 na 6,3%, compara cu e 2% cu Fitch anteriormente a calcula. Pa 2026, Fitch ta proyecta un crecemento di 3,7%.

Finansa publico tambe ta mustra resultado fuerte. Durante e prome seis lunanan di 2026, Gobierno a registra un surplus di Afl. 260 miyon, mas cu doble di loke tabata presupuesta pa henter aña. Fitch ta proyecta un surplus di 3,6% di PIB pa 2026 y 3,1% pa 2027.

Debe publico, mientras tanto, a baha te 62,9% di PIB na final di segundo kwartaal di 2026. Fitch ta calcula cu esaki por baha ainda mas, te 59,2% na final di 2026. E agencia si ta señala cu Aruba ainda tin reto pa ehecuta inversionnan di capital segun plan.

Turismo ta sigui sostene economia. Den e prome siete lunanan di 2026, cantidad di bishitante a subi cu 11,3% compara cu 2025, yega na aproximadamente un miyon, mientras turismo di crucero a crece cu 6%.

Reserva internacional tambe a fortalece, di USD 2 biyon na december 2025 pa USD 2,5 biyon na mei 2026, equivalente na 8,2 luna di pagonan externo. Segun Fitch, esaki ta considerablemente mas halto cu e promedio di paisnan cu rating BBB.

Fitch tambe ta destaca progreso cu e Rijkswet Houdbare Overheidsfinanciën Aruba (HOFA). Aprobacion di e ley lo por baha interes riba fiansanan di pandemia cu Hulanda y duna Aruba acceso na financiamento di inversion via Hulanda na condicionnan mas favorable.

Minister di Finansa Geoffrey Wever ta indica cu e resultado positivo no ta elimina e necesidad pa mantene disciplina presupuestario, sigui baha debe y crea espacio pa inversionnan necesario pa futuro economico y social di Aruba.

E actualisacion no ta un rating nobo. Aruba ta mantene BBB cu outlook positivo, despues cu Fitch a subi e rating na BBB na maart 2026.