AGTC 2026: Aruba kier turismo cu mas balor y responsabilidad

ORANJESTAD — Durante apertura di Aruba Global Travel Conference (AGTC) 2026, Aruba Tourism Authority (A.T.A.) a presenta su direccion strategico pa futuro di turismo, cu enfasis riba calidad, sostenibilidad y beneficio pa comunidad, en bes di solamente aumenta cantidad di bishitante.

Minister di Turismo Wendrick Cicilia, CEO di A.T.A. Ronella Croes y CMO Sanju Luidens a destaca cu exito turistico mester wordo midi tambe segun e balor cu turismo ta crea pa Aruba, su residentenan y huespednan.

Segun Croes, demanda pa Aruba ta sigui fuerte, pero e isla no mester tuma esaki como algo automatico. E meta ta stabilisa fluho di bishitante via aeropuerto y puerto, diversifica mercadonan y atrae huespednan cu ta cuadra cu un modelo di turismo responsabel, incluyendo destination weddings, famianan multigeneracional y biaheronan consciente di medio ambiente.

Luidens a splica cu mercadeo di Aruba ta enfoca cada bes mas riba crea un relacion duradero cu huespednan. Bou di campaña “When You Love Aruba, It Loves You Back”, A.T.A. ta stimula bishitantenan pa no solamente disfruta di Aruba, sino tambe respeta y proteha e isla, su cultura y comunidad.

E concepto di “Reciprocal Tourism” ta parti central di e vision aki: turismo como un relacion cu mester crea beneficio mutuo pa tanto destinacion como bishitante.

AGTC 2026 ta reuni socionan internacional, aerolineanan, tour operators y agentenan di biahe, cu segun A.T.A. tin un rol importante den posiciona Aruba como destinacion lider y den sostene un modelo turistico enfoca riba calidad, responsabilidad y balor na largo plazo.