Desde februari hospital ta papia, y casi na october ainda no tin solucion

ORANJESTAD — Director di Horacio Oduber Hospital, Jacco Vroegop, ta considera e reciente bishitanan di AVP y MEP na hospital importante pa duna Parlamento un bista mas completo di e situacion financiero y e presion creciente riba cuido medico na Aruba. Segun Vroegop den su reaccion na noticiacla diaranson, e problema no ta algo cu a aparece recientemente, sino resultado di varios aña di aumento den demanda di cuido mientras financiamento no a crece den mesun proporcion.

PLACA PA INVERSION A BAY PA EXTRA DEMANDA PA CUIDO

“Pa hopi aña nos ta mira mas demanda pa cuido, e cuido ta bira mas intensivo, e poblacion ta bira mas malo y e cantidad di pashent ta aumenta, mientras e placa no ta crece suficiente,” Vroegop a splica. Segun e director, hospital a logra compensa parti di e diferencia durante varios aña usando otro fuentenan di entrada. Sinembargo, e placa ey originalmente tabata destina pa inversion den innovacion, modernisacion y mehoracionnan cu mester beneficia tanto paciente como personal di hospital. “Nos a por compensa esaki bastante tempo cu placa di otro fuentenan, pero en realidad e placa ey no ta destina pa esei. E ta placa pa inverti den innovacion y renovacion, pa beneficio di nos poblacion y tambe nos personal,” Vroegop a bisa.

NO POR SOSTENE E MODELO MAS

Awor, segun e, e situacion a yega na un punto unda e modelo actual no ta sostenibel mas. Costo internacional a subi rapidamente, mientras tarifanan cu hospital ta haya pa cuido no ta refleja mas e costo real. “Nos a haci hopi cla (na partido AVP y MEP) cu mundo a bira hopi mas caro, y cu tarifanan simplemente no ta cuadra mas. Si no bin mas placa, tampoco nos por sigui haci tur cos,” el a advirti.

E consecuencia, segun Vroegop, por ta cu paciente mester warda mas largo pa cierto tratamento of cuido, particularmente den cuido cu por wordo planea.

HOPI PREGUNTA DI AVP Y MEP

Tanto AVP como MEP, segun e director, a haci hopi pregunta durante nan bishita y a scucha e splicacionnan di hospital. Vroegop a indica cu ambos delegacion a reconoce cu no tin un solucion simpel y cu e problema ta un responsabilidad comparti. Pero e punto cu mas ta sobresali ta e tempo cu e discusion ta andando sin un resultado concreto.

PAPIANDO DESDE FEBRUARI Y AWOR NO TIN SOLUCION AINDA

“Desde februari nos ta papia. Awor nos ta casi na october, y ainda no tin solucionnan realmente concreto,” Vroegop a remarca. El a haci referencia tambe na responsabilidad legal di AZV pa procura cu su aseguradonan — esta, poblacion di Aruba — tin acceso na cuido adecuado y cu suficiente cuido ta wordo cumpra.

Vroegop a expresa satisfaccion cu tanto AVP como MEP a tuma iniciativa pa acerca hospital. Segun dje, hospital mes no a invita e partidonan; nan a solicita e bishita nan mes.

“Mi ta hopi contento cu ambos a kier bin y cu nan a pidi pa bin conversa cu nos. Nos no a invita nan; nan mes a registra nan interes pa bin,” el a bisa.

Pa Vroegop, e actitud ey ta importante particularmente den un momento cu tin diferente version y posicion rond di e crisis financiero. “Ta positivo cu nan ta aplica hoor y wederhoor, scucha tur banda di e historia. Den un situacion manera esaki, esei ta hopi importante. Y tambe ta mustra cu nan ta tuma nan rol como parlamentario na serio.”

PROBLEMA NO TA SOLAMENTE DI CIFRA 

E mensahe principal di Vroegop ta keda cu e problema financiero di hospital no ta un discusion abstracto di cifra solamente. Si financiamento no wordo adapta na aumento real di costo y demanda di cuido, consecuencia eventualmente lo wordo sinti directamente door di paciente, principalmente den forma di mas tempo di espera y menos espacio pa ofrece tur cuido cu actualmente ta disponibel.