Fox Weather: Eagle Beach Aruba destaca como beach cu menos riesgo di sargassum

ORANJESTAD — Mientras sargassum (zeewier) ta causa molestia na diferente playa den Caribe, Aruba ta aparece entre e destinacionnan unda bishitantenan tin menos chance di topa acumulacion fuerte di e lama marino.

Segun un lista publica door di FOX Weather, Eagle Beach na Aruba ta entre 10 beach den Caribe cu generalmente ta menos afecta door di sargassum, specialmente durante e temporada cu normalmente ta core di maart te october.

E posicion di Eagle Beach na banda west, na banda leeward di Aruba, ta yuda protehe e beach contra e acumulacionnan grandi cu por afecta costanan mas exponi den Caribe.

Ademas di e menor riesgo di sargassum, Aruba ta wordo menciona como un destino atractivo durante temporada di horcan, debi na su posicion geografico mas zuid den Caribe.

Eagle Beach ta conoci internacionalmente pa su santo blanco, awa cla y espacio amplio, y segun e publicacion, ta un opcion fuerte pa turista cu kier evita playa unda sargassum por afecta e experiencia.

Sinembargo, esaki no ta nifica cu Eagle Beach nunca por haya sargassum. Corriente, biento y condicion di lama por cambia, pero comparando cu hopi otro area den Caribe, Aruba ta keda menos expuesto na acumulacion fuerte.