Biahe pa Aruba ta aparece den caso di fraude cu fondo di desastre na Merca

ORANJESTAD — Un muher di Michigan, Merca, a wordo condena na seis luna di prizon despues cu un hurado a declara cu el a comete fraude cu fondo federal destina pa victima di Horcan Ian na Florida. Den e investigacion, autoridadnan a menciona cu un dia prome cu e aplicacion pa ayudo di desastre, e muher a bolbe for di un biahe na Aruba cu USD 13,500 cash.

Toni Fisher, 61 aña, a haya cerca di USD 50,000 di FEMA despues di daño na su cas di vakantie na Fort Myers Beach durante Huracan Ian na 2022.

Fiscalnan a sostene cu Fisher a presenta e propiedad como su residencia principal pa por cualifica pa e asistencia, mientras segun investigadornan eltabata biba principalmente na Michigan. Autoridadnan a usa registro bancario, di aerolinea y casino como evidencia pa mustra cu su estadia na Florida tabata principalmente durante invierno.

Como parti di investigacion, agentenan federal a constata tambe cu Fisher a bolbe di Aruba cu USD 13,500 cash e dia prome cu el a solicita e fondo di desastre. E dato aki a forma parti di e informacion financiero y di viahe analiza durante e caso.

Su abogado, sinembargo, a contesta e version di fiscalia. Segun defensa, Fisher realmente a perde su cas di vakantie den e inundacion y a entrega tur documento autentico cu FEMA a pidi. E disputa principal tabata si e cas na Florida por a wordo considera su residencia principal y cuanto tempo realmente el tabata pasa ey.

Defensa a argumenta tambe cu FEMA a comete diferente error durante e proceso y cu Fisher a ofrece paga e placa bek ora el a wordo informa cu posiblemente el no tabata cualifica.

Despues di huicio, Fisher a paga e suma completamente bek. E caso a termina cu un sentencia di seis luna di prizon.