Aeropuerto di Aruba ta haya vehiculonan nobo pa emergencia di aviacion

ORANJESTAD — Brandweer Airport a haya dos vehiculo nobo specialisa pa responde na emergencia di aviacion na Aeropuerto Internacional Reina Beatrix. Minister di Husticia, Integridad y Transporte Publico, Arthur Dowers, hunto cu comandante di Cuerpo di Bombero Aruba, a presenta e vehiculonan oficialmente.

E vehiculonan Rosenbauer PANTHER 6x6 ta forma parti di un compra di tres unidad ARFF (Aircraft Rescue and Fire Fighting), cu un inversion total di Afl. 8,488,483.12. Dos ta actualmente na Aruba y e di tres ta ser spera prome cu fin di aña.

Cada vehiculo por carga 11,400 liter di awa, 1,600 liter di foam y 250 kilo di puiro pa paga candela, especificamente pa intervencion rapido durante accidente of emergencia cu avion.

Segun Minister Dowers, e inversion ta importante pa mantene capacidad di emergencia di aeropuerto na un nivel moderno, considerando cu conectividad aereo ta crucial pa turismo y economia di Aruba.

Dowers a enfatisa cu tecnologia moderno so no ta suficiente. Personal di Brandweer Airport mester haya entrenamento adecuado pa por usa e vehiculonan optimalmente.

Cu e adquisicion, Gobierno ta busca fortalece capacidad di Brandweer Airport pa proteha pasahero, tripulacion, personal di aeropuerto y e bomberonan mes durante emergencia di aviacion.