Sospechoso deteni na Colombia pa morto di turista Hulandes

BOGOTÁ — Polis na Colombia a detene un sospechoso relaciona cu morto di Marlies Genz, un muher Hulandes di 41 aña cu su curpa a wordo haya na fin di mei den un lago na west di Colombia.

Segun medio local La Crónica del Quindío, e sospechoso ta un homber Venezolano cu a wordo deteni den centro di Salento, un pueblo turistico situa alrededor di 160 kilometer di Bogotá. E homber lo wordo presenta dilanti huez durante un audiencia preliminar.

Genz tabata biaha na Colombia y tabata hospeda na Salento. Dia 25 di mei el a sali for di su hostel pa un caminata door di plantacionnan di cafe, pero nunca a yega na e finca unda e mester a registra su presencia.

Seis dia despues, autoridadnan a haya su curpa den un lago. Na fin di juni, famia a confirma cu su morto tabata resultado di un acto criminal.

Abogado Sébas Diekstra, cu ta representa e famia, a califica e detencion como “un desaroyo importante”. Segun e, prioridad di e famia awor ta haya claridad tocante exactamente kico a pasa cu Marlies y mira cu e persona responsabel wordo yama na cuenta.

Famia a indica cu e ultimo lunanan tabata emocionalmente intenso y cu nan ta spera cu e detencion lo trece mas informacion tocante motibo y circunstancianan di su morto.