Investigacion na Maxime Night Club pa posibel contrabanda di hende

ORANJESTAD — Unidad di Traficacion y Contrabanda di Hende (UMM) a haci un entrada hudicial diamars 15 di september na Maxime Night Club na Kruisweg, Oranjestad, den cuadro di un investigacion penal relaciona cu posibel contrabando di hende y empleo ilegal. 

UMM a ricibi asistencia di Unidad di Crimen Organisa (UGC), Bureau Financieel Onderzoek (BFO) y polis technico. Durante e operacion, autoridad a confisca administracion, cargadonan di informacion y un suma di placa.

No a haci ningun detencion. Segun Polis, e team investigativo ta ainda bezig cu analisis di tur informacion y material cu a wordo colecta.

Durante e entrada a topa cuater hende muher cu, segun e informacion preliminar, posiblemente tabata eherciendo prostitucion. Tambe a topa un trahado femenino tras di bar cu no tabata dispone di e permisonan valido necesario pa traha.

E cinco personanan a wordo transporta y scucha door di UMM. Nan no a wordo interoga como sospechoso y tampoco nan a wordo deteni.

E investigacion ta concentra, entre otro, riba posibel hechonan castigabel relaciona cu contrabando di hende y pone personanan traha ilegalmente.

E caso ainda ta den pleno investigacion y Polis ta indica cu, pa e momento, no por duna mas detaye.

Autoridad ta pidi posible victimanan of testigonan di traficacion of contrabando di hende pa tuma contacto via tipline 11141.