Tres Local Vacation Heroes honra pa nan impacto den turismo di Aruba

ORANJESTAD — Aruba Tourism Authority (A.T.A.) a honra Maidel Yero, John Marvin Kelly y Jandor Lampe como e Local Vacation Heroes 2026 durante Aruba Global Travel Conference (AGTC) dia 15 di september. E tres profesionalnan a wordo reconoci pa nan dedicacion, hospitalidad y impacto positivo riba experiencia di bishitantenan.

Maidel Yero tin 24 aña di experiencia den turismo y ta traha den Activities & Entertainment na Playa Linda Beach Resort. Jandor Lampe, bartender na La Cabana Beach Resort & Casino, tin 28 aña den sector, mientras John Marvin Kelly, conoci como “Uncle Johnny”, ta tourguide na ABC Tours cu mas cu 40 aña di experiencia.

E campaña Nominate Your Local Vacation Hero ta basa riba nominacionnan manda directamente pa bishitantenan. Den apenas tres siman, A.T.A. a ricibi mas cu 160 nominacion pa edicion 2026, cu historianan tocante servicio, bondad y conexion personal cu profesionalnan local.

Durante e tres edicionnan di e campaña, mas cu 400 nominacion a wordo ricibi. Un comite ta evalua e nominacionnan y cada aña ta escoge tres ganador di diferente area di e industria turistico.

Segun CEO di A.T.A., Ronella Croes, e reconocemento ta honra e personanan cu diariamente ta representa e servicio, cuido y hospitalidad cu Aruba ta conoci p’e.