Portal di Gobierno ta crea confusion cu informacion bieu di rijbewijs

ORANJESTAD — Durante un investigacion di Noticiacla riba e procedimiento pa renoba rijbewijs na Aruba, a sali na cla cu un portal oficial di Gobierno ainda ta publica informacion bieu, mientras cu Censo ya tin e informacion correcto y actualisa.

Riba e portal di Gobierno ainda ta indica cu, despues di tramita renovacion di un rijbewijs, e ciudadano mester warda tres te cuater siman pa haya e documento nobo den su man.

Pero e informacion actual di Censo ta diferente: ora un persona renoba su rijbewijs, e documento ta wordo entrega e mesun dia.

E diferencia entre e dos portal oficial ta crea confusion innecesario pa ciudadano cu ta depende di Gobierno su propio informacion online pa sa con e procedimiento ta funciona.

Mas serio ainda ta cu, segun informacion cu Noticiacla a haya durante su investigacion, e situacion no ta nobo. Algun aña pasa, un hefe di departamento ya lo a alerta cu e informacion riba e portal mester wordo actualisa. Sinembargo, esaki aparentemente no a sosode, y e informacion bieu a keda online.

E resultado ta cu Gobierno mes ta duna dos version diferente di un mesun servicio publico: un portal ta laga ciudadano kere cu e mester warda simannan, mientras Censo ta indica cu e proceso ta completa e mesun dia.

Den un tempo cu Gobierno ta stimula ciudadano pa usa mas servicio digital, exactitud di informacion online ta esencial. Un portal oficial no mester crea mas duda cu claridad.

E caso tambe ta pone un pregunta simpel riba mesa: si e informacion incorrecto ya a wordo señala algun aña pasa, dicon Gobierno ainda no a coregié?