Importador di panel solar perde di caso di impuesto, pero gana riba cable

ORANJESTAD — Un compania di panel solar na Aruba a perde mayor parti di un caso contra Aduana tocante impuesto di importacion riba material pa instalacion di panel solar. Sinembargo, Corte a duna e compania razon riba cable electrico, cu lo sigui paga solamente 2% impuesto di importacion.

E caso ta trata di asina yama golfplaatbouten, klem, moer, schroef y cable importa entre 2020 y 2022. E compania a declara tur e productonan como parti di panel solar, cu un tarifa di 2%. Despues di control, Aduana a considera cu mayor parti di e materialnan mester paga 6% y a manda tres naheffing cu un balor total di mas cu Afl. 33.000.

Corte a determina cu bout, klem, moer y schroef no ta participa directamente den produccion di electricidad. Nan ta sirbi pa monta e panelnan y, pa motibo ey, mester wordo clasifica den nan propio categoria aduanero cu tarifa mas halto.

Pa cable, sinembargo, eresultado ta diferente. Aunke cable tampoco ta genera electricidad, nan ta transporta e coriente produci pa panelnan pa resto di e sistema.

Un disposicion ministerial di 2011 na Aruba ta permiti un tarifa favorable di 2% pa componente electrico cu ta destina exclusivamente pa sistema di energia solar. Aduana ya ta aplica e tarifa aki pa inverter y bateria, y Corte a determina cu cable mester cay bou e mesun regla.

Consecuencia ta cu e ‘naheffing’ riba cable mester wordo reduci na 2%, mientras e otro dos naheffing ta keda na vigor.

E sentencia ta importante pa sector solar local, paso companianan na Aruba ta depende fuertemente di material importa y diferencia den impuesto di importacion por afecta directamente costo final di proyecto solar.