Dos siman a bira mas cu un luna: ainda no tin claridad den caso di e-steps

ORANJESTAD — Mas cu un luna despues cu Minister di Husticia Arthur Dowers a indica na Noticiacla cu dentro di aproximadamente dos siman lo por tin mas claridad den e disputa legal rond di e-steps y e-scooters na Aruba, te awe no tin un decision publico nobo cu ta pone claridad den e situacion.

Dia 5 di augustus 2026, Dowers a bisa den entrevista cu Noticiacla cu e companianan envolvi tabata entrega nan ultimo documentonan na Corte y cu Gobierno lo entrega su reaccion durante e siman ey. Segun e minister, despues di esaki un decision di hues por a wordo spera dentro di aproximadamente dos siman.

E expectativa, pues, tabata cu rond di medio di augustus por a tin mas claridad. Awor nos ta 15 di september.

E DOS SIMAN A PASA

Te awe no ta aparece un decision nobo publico ni un comunicacion oficial cu ta aclarea unda e caso ta para actualmente.

E ultimo sentencia formal publico den e disputa, di 22 di mei, a determina cu Gobierno no por simplemente confisca e vehiculonan sin un base administrativo valido. Corte no a declara e actividad legal; e punto tabata principalmente cu Gobierno mester sigui e procedimiento correcto.

Despues di esaki Gobierno a duna e operadornan un termino pa stop huurmento of regularisa nan situacion. E termino a vence na juni, pero e vehiculonan a sigui visibel riba caminda.

Gobierno despues a impone un ‘last onder dwangsom’, cu por yega na Afl. 500 pa cada vehiculo. E companianan a desafia esaki den Corte y e procedimiento hudicial a sigui.

Na augustus, Minister Dowers a indica cu Gobierno tabata sperando e siguiente paso di Corte dentro di aproximadamente dos siman. E dos siman ey ya a bira mas cu un luna.

UN PREGUNTA SIMPEL: UNDA E CASO TA PARA?

Pa e consumidor, turista, hotel, operador comercial y polis, e pregunta principal ta keda mescos: kico exactamente ta permiti awe? Si Gobierno ta considera uso of huurmento di cierto e-bikes y e-steps ilegal riba caminda publico, con e prohibicion ta wordo aplica actualmente? Si Corte ainda no a dicidi, ki fase e procedimiento tin actualmente?

Y si ya tin un decision cu ainda no a haya suficiente publicidad, kico e decision ta nifica pa e companianan y pa usuario?

Despues di lunas di conflicto, confiscacion, procedimiento hudicial, deadline y sancion anuncia, e asunto merece un update publico.

Noticiacla ta recorda Ministerio di Husticia cu e periodo di aproximadamente dos siman menciona publicamente ya a pasa ampliamente.

Comunidad no por keda indefinidamente den un situacion caminda Gobierno ta indica cu un actividad ta ilegal, operadornan ta sigui activo y usuario no tin certeza tocante kico ta permiti.

E pregunta pa autoridadnan awor ta hopi simpel: Unda e caso di e-steps ta para, y ki ora Aruba lo haya e claridad cu a wordo anuncia?